ازاي نحمي ولادنا من التحرش؟
الطفل سواء بنت أو ولد ما ينفعش تمامًا يتساب مع حد طول ما هو مش قادر يميز أو يتكلم (بحد أدنى ٤ سنين).
في الفترة دي لازم يتعلم عن جسمه، وازاي يحكي لو حصله حاجه، وايه الأماكن اللي ما ينفعش حد يقرب منها غير ماما، بعد كده ممكن -ولا يُفضل- انه يتساب مع الأهل أو في حضانة فيها كاميرات. لأن للأسف معظم حوادث التحرش بتحصل من الأهل ومن دواير الثقة.
من سن ٣ سنين بنبدأ نعلم الطفل ٤ حاجات مهمة:
١. جسمك بتاعك لوحدك وأنت بس اللي تقدر تتحكم فيه.
ممنوع تماماً الطفل يقعد على رجل أي حد مهما كان مين. وممنوع أن أهله يجبروه يحضن أو يبوس حد بالعافية تحت أي ظرف لأن ده بيخليه يحس أن الإجبار على الحب شيء عادي وممكن ما يفهمش الفرق لو حد تاني حضنه أو باسه بالعافية. كمان ما ينفعش حد يهزر قدام الطفل بجمل زي هتجوزه أو دي مراتي.
ومهم في السن ده أن الأهل يستأذنوا ولادهم قبل ما يحضنوهم عشان يتعودوا.
٢. أجزاء جسمي الخاصة:
لازم الطفل يفهم أن فيه أجزاء من جسمه ما ينفعش حد يشوفها/يلمسها غير ماما بس، وبالتالي لو حد تاني عمل ده لازم يقول لأهله.
الأطفال في السن ده بيتعلموا من أفعال أهلهم أكتر من الكلام عشان كده مهم أن الأهل ما يغيروش هدومهم قدام الأطفال ولا يغيروا هدوم ولادهم قدام الناس.
٣. أمان وحب غير مشروط من بابا وماما:
لازم الطفل يكون مستوعب أن مهما حصل أهله بيحبوه ومصدقينه وهيقفوا معاه مهما كانت الظروف. كتير من المتحرشين بيستغلوا سوء العلاقة بين الطفل والأهل ويقنعوه ان لو قال انه تم التحرش بيه أهله هيعاقبوه.
٤. لغة تواصل بين الطفل والأهل ومفيش أسرار:
لازم الطفل يحكي لأهله كل حاجه ويبقى فاهم أنما ما ينفعش حد يطلب منه حاجه ويقوله دي سر طول ما هو لسه صغير. غير كده لغة الحوار بتخلي الأهل يلاحظوا أي تغيير في سلوك الطفل بيدل انه اتعرض لحاجه. وما تكدبوش ولادكم وصدقوا كل كلمة بيقولوها. لو الطفل قال ما بحبش فلان قرب منه واسأله ليه واوعى تجبره يتعامل معاه.
كمان مهم أن الثقافة الجنسيـة يكون مصدرها الاول هو الأهل بصورة علمية تتناسب مع القيم والأخلاق المجتمعية عشان الطفـل يثق في أهله وما يدورش على المعلومات في أماكن غلط.
ممكن بعد ده كل نبتدي نلعب مع الطفل ونحطله سيناريوهات عشان نتأكد انه استوعب النقط دي ونسأله لو حد لمسك في المناطق الخاصة تعمل ايه؟ طب لو حد قالك تعالى معايا لوحدك تعمل ايه؟
– طب لو الطفل بالفعل حد اتحرش بيه المفروض نعمل ايه؟
أول حاجه لازم تحضن الطفل وتأكدله انك بتحبه وانه مش غلطان وأنك هترجع حقه وهتحاسب المعتدي قدامه وتعمل ده فعلاً. اسمع منه من غير أي نصايح ولا أسئلة ملهاش لازمه مهما كنت متعصب أو كان عندك فضول تعرف؛ كل حاجه ليها وقتها المناسب.
أي رد فعل غلط مع الطفل ممكن يخليه حاسس بالذنب أو يخليه ما يحكيش عن اللي حصله بعد كده. وطبعاً خطوة الدكتور النفسي مهمة جداً حتى لو الطفل مش باين عليه انه متأثر.